काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले पूर्वराजा ज्ञानेन्द्र शाहलाई पक्राउ गरेर देखाउन सरकारलाई चुनौती दिएका छन् । शनिबार (चैत १६) पार्टीको केन्द्रीय कार्यसम्पादन समिति बैठकको निर्णय सार्वजनिक गर्ने क्रममा सञ्चारकर्मीको जिज्ञासामा उनले यस्तो चुनौती दिएका हुन् ।

“राजालाई विवादमा तान्नु हुन्न भन्ने कुरामा अहिले पनि स्पष्ट छु,” उनले भने, “राजालाई एरेस्ट गरेर देखाउनु अनि शक्ति हामी देखाउँछौँ ।”

• फेसबुकमा चलाइयो ‘एरेस्ट ज्ञानेन्द्र’ अभियान

उनले आफूले निर्वाचन जित्ने बहानाले मात्र शाहको नाम नलिएको जिकिर गरे । राजसंस्था देशको आवश्यकता भएकामा उनले जोड दिए ।

“राजाको नाम लिएपछि चुनाव जित्न सजिलो हुन्छ भनेर राजा चाहिन्छ भनेको होइन । त्यसकारणले राजा जसले बोके पनि हुन्छ, जसले ल्याए पनि हुन्छ भनेर हामीले बारम्बार भनिरहेका छौँ,” उनले भने, “हामीले कुनै व्यक्तिगत फाइदा र व्यक्तित्व विकासको प्रयोजनका लागि राजसंस्था चाहिन्छ भनेको होइन ।”

उनले शुक्रबार (चैत १५) तीनकुनेको घटनाका विषयमा पूर्वराजाको नाम जोडिएकामा असन्तुष्टि व्यक्त गरे । त्यसबारे आफ्नो कुनै टिप्पणी नभएको उनले बताए । पूर्वराजालाई कुनै विवादमा तान्न नहुने उनको भनाइ थियो । न्युज एजेन्सी नेपाल