चिहान
होला एउटा चिहान 
कुनै बिरानो खोला या जंगलमा 
मलाई पर्खिरहेको 

होला अर्को चिहान 
मेरो गाउँको माटोमा 
मेरो बाटो हेरिरहेको 

मेरो ‘फेवरेट’चाहिँ 
तिम्रो दिलभित्रको हो
जहाँ तिमीले मलाई 
जिउँदै पुरिदिएकी छ्यौ  

जसमाथि पहिलेपहिले 
मेरो घर हुने गर्थ्यो
जसमा तिमीले अहिले 
अरू कसैलाई बसाएकी छ्यौ !

०००

ड्राफ्ट
उनको प्रेम पनि 
बडो अचम्मको छ 
उनको प्रेम पनि ।

भन्छिन्–
म गएपछि खुबै याद आउनेछु 
उनको प्रत्येक धड्कनमा 
जीवित रहनेछु ।

भन्छिन्–
म उनको निम्ति के थिएँ भनेर 
पल प्रतिपल महसुस हुनेछु ।

उनको प्रेम पनि 
साँच्चै अचम्मकै छ 
उनको प्रेम पनि ।

भन्छिन्– 
प्रेमैप्रेमले भरिएको 
मेरो श्रद्धाञ्जलीको ड्राफ्ट 
ऊसँग सधैँ तयार छ ।

(खोटाङ)