काठमाडौं । नेकपा (एकीकृत समाजवादी)का अध्यक्ष माधवकुमार नेपालले पुँजीवादी व्यवस्थालाई बदल्न जरुरी रहेको बताएका छन् । शनिबार (चैत २) ललितपुरमा समाजावदी मोर्चाले आयोजना गरेको पत्रकार सम्मेलनका क्रममा उनले यस्तो बताएका हुन् ।

उनले पुँजीवादी व्यवस्था बदल्नुपर्नेमा जोड दिए । सामन्तवादी व्यवस्थामा जाने कुरा सह्य नहुने उनले उल्लेख गरे । “अहिले व्यवस्था बदल्नुपर्छ भन्ने कुरा आइरहेको छ । अवश्य पनि पुँजीवादी व्यवस्थालाई बदल्नुपर्छ,” उनले भने, “तर, सामन्तवादी व्यवस्थामा जाने होइन ।”

दलाल पुँजीवादको वर्चस्व रहेको व्यवस्था परिवर्तन गरेर समाजवादी गणतन्त्रमा जानुपर्ने उनले बताए । “दलाल पुँजीवादको वर्चस्व रहेको यो व्यवस्था, जो वंशको आधारमा पहिला १०४ वर्षसम्म र त्यसपछि २४० वर्षसम्म शासन सञ्चालन गरेर बसेकाहरू सत्ताको दुरुपयोग गरेर हालीमुहाली चलाएकाहरू हुन्,” उनले भने, “तिनीहरूबाट मुक्ति चहियो । समाजवादी गणतन्त्रमा जानैपर्छ ।”

त्यसका निम्ति आफ्नो पार्टीले नेपाली विशेषताको समाजवादको नयाँ अवधारणा अघि सारेको उनले उल्लेख गरे ।

अध्यक्ष नेपालले व्यवस्था बदल्न चाहनेहरू प्रतिगमनतिर नभएर अग्रगमनतिर आउनुपर्ने बताए । उनले वंशको कुरा छोड्न सबैलाई आग्रह गरे ।

पूर्वराजा ज्ञानेन्द्र शाहले कुनै त्याग, तपस्या, बलिदान नगरेको बरु देशलाई लुट्ने काम गरेको उनले आरोप लगाए । पूर्वराजा शाहप्रति आरोप लगाउँदै उनले लुट्ने इतिहास बोकेकाहरूको हातमा देशलाई लगेर बर्बाद पार्न नहुने बताए ।

देशको इज्जत, प्रतिष्ठा र मर्यादालाई माथि उठाउन अब नयाँ समाजवादी व्यवस्था जरुरी रहेको उनको भनाइ थियो । न्युज एजेन्सी नेपाल