काठमाडौं । सत्तारूढ नेपाली कांग्रेसले बन्न बाँकी कानुनका विधेयक तत्काल संसद्‌मा लैजान सरकारलाई आग्रह गरेको छ ।

बिहीबार संसद् भवनको ल्होत्से हलमा बसेको संसदीय दलको बैठकले बन्न बाँकी विधेयकका मस्यौदा तत्काल संसद्‌ लैजान सरकारलाई आग्रह गर्ने निर्णय गरेको हो ।

“नेपाली कांग्रेसको संसदीय दलको बैठक संविधान कार्यान्वयनका लागि आवश्यक कानुनका विधेयक तत्काल संसद्‌मा लैजान सरकारलाई आग्रह गर्ने निर्णय गरेको छ,” बैठकपछि प्रमुख सचेतक श्याम घिमिरेले भने ।

कांग्रेसले संसद्‌मा विचाराधीन विधेयक पारित गर्न भूमिका खेल्न आफ्ना सांसदहरूलाई निर्देशन पनि दिएको छ । “संसद्‌मा विचाराधीन विधेयक पारित गर्न प्रभावकारी भूमिकाका लागि सांसदहरूलाई निर्देशन दिने निर्णय भएको छ,” उनले भने ।