काठमाडौं । नेकपा (एकीकृत समाजवादी)का अध्यक्ष माधवकुमार नेपालले तत्कालीन नेपाल कम्युनिस्ट पार्टी (नेकपा) ब्युँताउन आह्वान गरेका छन् । शनिबार एकीकृत समाजवादी भक्तपुरको प्रथम जिल्ला अधिवेशनमा उनले यस्तो बताएका हुन् ।

सबै मिलेर अघि बढ्ने भए तत्कालीन नेकपा ब्युँताउन आफू तयार रहेको उनले स्पष्ट पारे । उनले प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेकपा (एमाले)का अध्यक्ष केपी शर्मा ओली तयार भए तत्कालीन नेकपा ब्युँताउन सकिने बताए ।

एमाले अध्यक्ष ओलीले ७० वर्षको उमेरहद हटाएर आफू कुर्सीबाट हट्न नचाहेको आरोप पनि उनले लगाए । आफू ७० वर्ष कटेपछि पार्टीको पदमा नबस्ने उनको भनाइ छ ।

अध्यक्ष नेपालले नेपालको राजनीति प्रतिगामी दिशामा लैजाने कोसिस भइरहेको पनि बताए । उनले राजावादीले टाउको उठाउने कोसिस गरे पनि सफल हुन नदिइने उल्लेख गरे ।