काठमाडौं । देशका केही भूभागमा आज वर्षाको सम्भावना रहेको छ । केही भूभागमा बिहानैदेखि वर्षा भइरहेको छ । 

कोसी र मधेस प्रदेशका अधिकांश स्थानमा वर्षा हुनेछ । कोसी र मधेसमा मध्यम वर्षा हुनेछ । यी प्रदेशका केही स्थानमा वर्षा सुरु भइसकेको छ । 

बाँकी प्रदेशका पहाडी र हिमाली भूभागमा वर्षा र हिमपातको सम्भावना रहेको मौसमविद् डेबिड ढकाल बताउँछन् । 

यसैबीच, काठमाडौंमा बिहानैदेखि मेघगर्जन र चट्याङसहित वर्षा भइरहेको छ । 

“काठमाडौंका धेरै स्थानमा वर्षा भइरहेको छ । यो क्रम अझै केही समय रहनेछ,” मौसमविद् ढकालले बाह्रखरीसँग भने, “केही समयपछि रहने र मध्याह्नपछि काठमाडौंमा पुनः वर्षा हुने सम्भावना छ ।” 

मौसमविद् ढकालका अनुसार आज काठमाडौंमा मध्यम वर्षा हुनेछ । 

• काठमाडौंमा बिहानैदेखि मेघगर्जन र चट्याङसहित वर्षा

राति पनि देशका धेरै स्थानमा वर्षा हुने सम्भावना छ । दिउँसोभन्दा राति ठूलो वर्षाको सम्भावना छ । राति कोसी, मधेस, वाग्मती, गण्डकी र लुम्बिनी प्रदेशमा वर्षाको सम्भावना रहेको छ । 

बाँकी प्रदेशको पनि पहाडी र हिमाली भूभागमा वर्षा र हिमपातको सम्भावना रहेको मौसमविद् ढकालले जानकारी दिए । 

“काठमाडौं भोलि पनि वर्षा हुनेछ । भोलि भने केही कम वर्षा हुनेछ,” मौसमविद् ढकाल भन्छन्, “शनिबार पनि काठमाडौंमा वर्षाको सम्भावना छ, तर आजजस्तो ठूलो वर्षा हुनेछैन ।” 

न्यूनचापीय प्रणाली, स्थानीय वायु र बंगालको खाडीबाट आएको जलवाष्पयुक्त वायुका कारण वर्षा भएको जल तथा मौसम विज्ञान विभागले जनाएको छ ।