काठमाडौं । सशस्त्र प्रहरीले काभ्रेबाट लागुऔषधसहित दुईजनालाई पक्राउ गरेको छ । काभ्रेको बनेपा–८ स्थित बसपार्क इलाकाबाट करिब पाँच किलो पोलाइन्ड नामक लागुऔषधसहित आज बुधबार दुईजनालाई नियन्त्रणमा लिएको सशस्त्र प्रहरीले जनाएको छ ।

काभ्रेको धुलिखेल नगरपालिका–६ बस्ने २८ वर्षीय अमृत भण्डारी र सोही नगरपालिका–४ बस्ने ३० वर्षीय श्रीकृष्ण सत्याल लागुऔषधसहित पक्राउ परेका हुन् । 

उनीहरूलाई सशस्त्र प्रहरी बल इन्टेलिजेन्स ब्युरोको विशेष सूचनाका आधारमा सशस्त्र प्रहरीको १५ नम्बर गणले सोही ठाउँको सेकुवा सेन्टर तथा नेवारी खाजाघरबाट नियन्त्रणमा लिएको हो । 

सशस्त्रले उनीहरूको सागथबाट बा३८प १४८१ नम्बरको मोटरसाइकल समेत बरामद गरेको छ । नियन्त्रणमा लिइएका दुवैजनालाई आवश्यक अनुसन्धान तथा कारबाहीका निम्ति सम्बन्धित निकायमा बुझाइएको सशस्त्र प्रहरीका प्रवक्ता शैलेन्द्र थापाले जानकारी दिए । 

सशस्त्र प्रहरीले यसअघि यही चैत १४ गते काठमाडौं महानगरपालिका–९ सिनामंगलबाट सात किलो तथा फागुन १ गते काठमाडौंको गोकर्णेश्वरमा पर्ने नयाँबस्ती र भदौ २२ गते कोटेश्वरबाट ५÷५ किलो पोलाइन्ड नामक लागुऔषधसहित पाँचजनालाई पक्राउ गरी सम्बन्धित निकायमा बुझाएको थियो ।