काठमाडौं । अमेरिकी संसद्को फरेन अफेयर्स (विदेश मामिला) समितिका सभापति तथा फ्लोरिडाबाट रिपब्लिकन पार्टीका सांसद ब्रायन मास्टले नेपालमा 'नास्तिकता' फैलाउन पाँच लाख अमेरिकी डलर खर्च गरिएको खुलासा गरेका छन् । 

सीबीएसकी पत्रकार मार्गरेट ब्रेननको ‘फेस द नेसन’ कार्यक्रममा मास्टले भनेका छन्, “नास्तिकताका लागि पाँच लाख अमेरिकी डलर नेपालमा खर्च गरिएको छ ।”

अमेरिकी राष्ट्रपति डोनाल्ड ट्रम्पले अमेरिकी अन्तर्राष्ट्रिय विकास नियोग (यूएसएआईडी)का गतिविधि रोक्नुका सम्बन्धमा भएको कुराकानीमा विदेश मामिला समितिका सभापति मास्टले उक्त खुलासा गरेका हुन् ।

उनले कोलम्बियामा ट्रान्सजेन्डर अपरेसनमा ५० हजार अमेरिकी डलर, पेरूमा एलजीबीटीक्यू सम्बन्धमा ४७ हजार अमेरिकी डलर, इक्वेडरमा ड्र्याग शोहरूमा २० हजार अमेरिकी डलर खर्च भएको उदाहरण पनि प्रस्तुत गरेका छन् ।

अमेरिकी राष्ट्रपति ट्रम्पले अमेरिकाले विभिन्न देशलाई यूएसएआईडी मार्फत उपलब्ध गराउँदै आएको सहायताको दुरुपयोग भएको भन्दै एक आदेशमार्फत सहायता समीक्षाका लागि तीन महिना बन्द गर्ने निर्णय गरेका थिए । 

ट्रम्पको यस निर्णयले विश्वभर हलचल मचाएको छ । विश्वभर यूएसएआईडीले उपलब्ध गराउँदै आएका सहायता रोकिएका छन् । यसबाट नेपाल पनि प्रभावित भएको छ । 

यति नै बेला अमेरिकी संसद्को विदेश मामिलासम्बन्धी समितिका सभापति मास्तले अमेरिकी सहायताको दुरुपयोग नेपालमा पनि भएको उदाहरण दिएका हुन् । 

पछिल्ला वर्षहरूमा यूएसएआईडीले नेपाललाई वार्षिक औसतमा १२५ मिलियन अमेरिकी डलर आर्थिक सहायता उपलब्ध गराउँदै आएको थियो । यो सहयोग रोकिँदा यूएसआईडी र यूएसएआईडीको सहायता लिई नेपालमा विकास कार्यक्रम चलाउने अन्तर्राष्ट्रिय गैरसरकारी संस्था (आईएनजीओ) प्रभावित भएका छन् ।