काठमाडौं । ललितपुरका विभिन्न स्थानबाट स्कुटर चोरी भएको घटनामा संलग्न रहेको आरोपमा प्रहरीले दुईजनालाई पक्राउ गरेको छ । पक्राउ पर्नेमा मकवानपुरको भीमफेदी गाउँपालिका–७ का २८ वर्षीय सनम मगर र हेटौँडा उपमहानगरपालिका–१९ का २० वर्षीय शैलेश आले छन् ।

उनीहरू काठमाडौंको बल्खुमा बस्दै आएका थिए । गएको शुक्रबार उनीहरूलाई नियन्त्रणमा लिइएको प्रहरी प्रधान कार्यालयले जानकारी गराएको छ ।

ललितपुरको नख्खुस्थित सनराइज अपार्टमेन्टबाट चोरी भएको बा९७प ३०२ नम्बरको स्कुटरसहित सनम र झरुवारासीबाट चोरी भएको बा९५प २८०९ नम्बरको स्कुटरसहित शैलेशलाई पक्राउ गरिएको हो । प्रहरीले उनीहरूमाथि थप अनुसन्धान गरिरहेको छ । 

यस्तै, काठमाडौंको माकलबारीबाट गएको शुक्रबार चोरी भएको वाग्मती प्रदेश ०२–०३८ प ०३४५ नम्बरको मोटरसाइकलसहित दुईजना पक्राउ परेका छन् । शनिबार प्रहरीले उनीहरूलाई नियन्त्रणमा लिएको हो ।

प्रहरीका अनुसार, पक्राउ पर्नेमा मकवानपुरको बकैया गाउँपालिका–१ का १८ वर्षीय किशोर र वाग्मती गाउँपालिका–३ का २४ वर्षीय छविलाल बज्यु छन् ।